ព្រលានយន្តហោះថ្មី នៅខេត្តសៀមរាប នឹងចាប់ផ្តើមស្ថាបនា ក្នុងទឹកប្រាក់ជាង ១ពាន់លានដុល្លារ
តាមគម្រោង អាកាសយាន្តដ្ឋានថ្មីនៅខេត្តសៀមរាបនោះ វិនិយោគដោយអ្នករកស៊ីមកពីប្រទេសកូរ៉េខាងត្បូង ដោយគ្រោងចំណាយ ថវិកាសរុបជាង ១ពាន់លានដុល្លារ ។
អាកាសយាន្តដ្ឋានថ្មី នៅខេត្តសៀមរាប គ្រោងនឹងស្ថាបនាឡើងលើផ្ទៃដីទំហំ ៥០០ ហិកតា និងមានចំងាយប្រមាណ ៤០គីឡូម៉ែត្រ ប៉ែកខាងកើត ទីក្រុងសៀមរាប។ ទីតាំងនោះ ជាប់ផ្ទៃដីស្រុកចំនួន២ គឺស្រុកជីក្រែង និងស្រុកសូទ្រនិគម ក្នុងខេត្តសៀមរាប។ អាកាសយាន្តដ្ឋានថ្មី ក៏នឹងក្លាយជាទីក្រុងរណបមួយ របស់ខេត្តប្រាង្គប្រាសាទមួយនេះ។
តាមគម្រោង អាកាសយាន្តដ្ឋានថ្មី ដែលនឹងសាងសង់ឡើង ដើម្បីទទួលភ្ញៀវទេសចរណ៍បានជាង ១៤លាននាក់ ក្នុងមួយឆ្នាំៗ មកកាន់ប្រាសាទអង្គរ គ្រោងនឹងបើកការដ្ឋាន សាងសង់ជាផ្លូវការនៅក្នុងឆ្នាំ២០១២ និងត្រូវស្ថាបនាបញ្ចប់ នៅក្នុងឆ្នាំ២០១៥ ។
លោក ឌិត ដន អភិបាលស្រុកសូទ្រនិគម បានឲ្យ CEN ដឹងថា គម្រោងអាកាសយាន្តដ្ឋានអន្តរជាតិថ្មីនៅខេត្តសៀមរាប មិនប៉ះពាល់ដល់ដីរបស់ប្រជាជនឡើយ គឺក្រុមហ៊ុនកូរ៉េ បានទិញដីទំហំ ៥.០០០ ហិកតានោះ ដោយខ្លួនឯង ។
ចំណែកលោក តឹក រ៉េតសំរេច រដ្ឋលេខាធិការទីស្តីការគណៈរដ្ឋមន្ត្រី បានប្រាប់ទស្សនវដ្តីក្នុងស្រុកថា អាកាសយាន្តដ្ឋានថ្មី នៅខេត្តសៀមរាបនេះ គឺសំរាប់យន្តហោះ ប្រភេទបូអ៊ីង ( Boeing ) អាចចុះចតបាន។ នៅពេលការស្ថាបនាត្រូវបានបញ្ចប់ ហើយតំបន់ នៅជុំវិញនោះ ក្លាយទៅជាទីក្រុងដ៏ធំមួយនោះ វានឹងផ្តល់ឱកាសឱ្យប្រជាពលរដ្ឋមានការងារធ្វើ រាប់ម៉ឺននាក់ នាពេលអនាគត ។
នៅខេត្តសៀមរាប សព្វថ្ងៃ មានអាកាសយាន្តដ្ឋានមួយ ដែលតូច ហើយម្យ៉ាងទៀតស្ថិតនៅជិតប្រាសាទអង្គរវត្ត។
គួរំលឹកថា ប្រទេសកម្ពុជាមានអាកាសយាន្តដ្ឋានកម្រិតអន្តរជាតិតែបីប៉ុណ្ណោះ ដែលកំពុងដំណើរការរាល់ថ្ងៃ គឺទី១ អាកាសយាន្តដ្ឋានអន្តរជាតិភ្នំពេញ, ទី២អាកាសយាន្តដ្ឋាន អន្តរជាតិសៀមរាប និងទី៣ អាកាសយាន្តដ្ឋានអន្តរជាតិកងកេង ក្នុងខេត្តព្រះសីហនុ ។ ចំណែកអាកាសយាន្តដ្ឋាន នៅតាមបណ្តាខេត្តមួយចំនួនទៀត មិនបានដំណើរការ ចាប់តាំងពីស្រុកទេស មានសង្គ្រាមរហូតមកដល់សព្វថ្ងៃនេះ ។
ក្នុងនោះអាកាសយាន្តដ្ឋានអន្តរជាតិពោធិ៍ចិនតុង ដែលបានចាប់ផ្តើមកសាងមុនដំបូងគេនៅក្នុងឆ្នាំ១៩៥៧ និងបានសម្ភោធ ដាក់ឱ្យប្រើប្រាស់ ជាផ្លូវការ នៅថ្ងៃទី១៩ ខែមករា ឆ្នាំ១៩៥៩ ។ នៅខែតុលា ឆ្នាំ១៩៩៤ ផ្លូវរត់ឡើងចំងាយប្រវែង ៣.០០០ ម៉ែត្រ ត្រូវបានទទួលរ៉ាប់រងជួសជុលជាថ្មីឡើងវិញ ដោយក្រុមហ៊ុន Meada របស់ប្រទេសជប៉ុន ។
បន្ទាប់មកផ្លូវរត់ឡើងប្រវែង ៣៥០ម៉ែត្រ ត្រូវបានសាងសង់បន្ថែមទៀត ដោយក្រុមហ៊ុនបារាំងមួយ ឈ្មោះ G.T.M (Grand Travaux de Marseille) សំរាប់ចុះចតប្រភេទយន្តហោះធុនធំៗ ដូចជា ATR Boeing332 , Boeing332 និងប្រភេទយន្តហោះ Boeing 747 ជាដើម ។
ដើម្បីឆ្លើយតបនឹងកំណើននៃចំនួនអ្នកធ្វើដំណើរ អាកាសយាន្តដ្ឋានអន្តរជាតិភ្នំពេញ ត្រូវបានបើកការដ្ឋានរុះរើសាងសង់ជាថ្មីឡើងវិញ នៅក្នុងឆ្នាំ១៩៩៥ ដោយក្រុមហ៊ុន SCA របស់ប្រទេសបារាំង ហើយត្រូវបានកសាងរួចរាល់ជាស្ថាពរនៅក្នុងឆ្នាំ២០០២ ជាលទ្ធផល ព្រលានយន្តហោះអន្តរជាតិភ្នំពេញ ទទួលបានអ្នកដំណើរបាន ៥លាននាក់ ក្នុងមួយឆ្នាំ ។
អាកាសយាន្តដ្ឋានអន្តរជាតិពោធិ៍ចិនតុង ត្រូវបានប្តូរឈ្មោះមកថា អាកាសយាន្តដ្ឋានអន្តរជាតិភ្នំពេញ កាលពីថ្ងៃទី ១៥ ខែមករា ឆ្នាំ២០០៣ ៕
ទឹកឃ្មុំអមតៈ
 |
| ផលិផលទឹកឃ្មុំដាក់លក់នៅតាមផ្សារទំនើប នៅសហរដ្ឋអាមេរិក |
នៅសហរដ្ឋអាមេរិក ទឹកឃ្មុំគឺជាអាហារពេលព្រឹក ដែលគេបរិភោគរាល់ថ្ងៃជាមួយនឹងនំអំបែង ដែលភាសាអង់គ្លេសហៅថា pancake ។ លើសពីនេះទៀត ទឹកឃ្មុំក៏ត្រូវគេយកទៅប្រើជំនួសស្ករ នៅក្នុងការធ្វើនំថ្លៃៗជាច្រើនមុខទៀតដែរ។ ហើយនៅតាមហាងម្ហូបអាហារណាក៏ដោយ ក៏មានទឹកឃ្មុំសម្រាប់យើងដែរ។ ដូចនេះ ទឹកឃ្មុំជាអាហារដ៏សំខាន់បំផុតសម្រាប់ជនជាតិអាមេរិកាំង។
 |
| នំអំបែងជាមួយទឺកឃ្មុំ (pancake) ជាអាហារពេលព្រឹករបស់ជនជាតិអាមេរិកាំង |
ដោយឡែក នៅប្រទេសកម្ពុជាយើង ទឹកឃ្មុំគឺជាផលិតផលរបស់ប្រជាកសិករយើង នៅតាមតំបន់ជនបទនានានៅទូទាំងប្រទេស។ ដូចនេះ បើសិនជាយើងនាំគ្នាបរិភោគទឹកឃ្មុំឲ្យបានកាន់តែច្រើន ប្រាក់ចំណូលរបស់ប្រជាកសិករយើង នឹងកាន់តែកើនឡើងច្រើនឡើងថែមទៀត។
ទន្ទឹមនឹងនេះដែរ ការប្តូររបៀបយកឃ្មុំរបស់ប្រជាកសិករយើង ពីការយកឃ្មុំដោយកាប់យកមែកឈើដែលជាបង្គង មកជាការយកឃ្មុំដោយកោសយកតែក្បាលទឹក គឺជារបកគំឃើញដ៏អស្ចារ្យមួយ ប្រចាំសតវត្សទី ២១ យើងនេះ (discovery of the century) ។ ខ្ញុំបាទហ៊ាននិយាយដូច្នេះ ពីព្រោះការយកឃ្មុំដោយកោសយកតែក្បាលទឹក គឺជាប្រការដែលផ្តល់លទ្ធភាពឲ្យមេឃ្មុំអាចបង្កើតឡើងវិញនូវ ក្បាលទឺកថ្មីមួយទៀត។ ដូចនេះការយកឃ្មុំដោយកោសយកតែក្បាលទឹក គឺជាការដែលធ្វើឲ្យទឹកឃ្មុំមានជីវិតអមតៈ ព្រោះបន្ទាប់ពីការកោសយកក្បាលទឹករួចមក មេឃ្មុំនឹងបង្កើតក្បាលទឹកមួយថ្មីទៀតឡើងវិញជារៀងរហូត។ យើងអាចនិយាយបានម៉្យាងទៀតថា ការយកឃ្មុំដោយកោសយកតែក្បាលទឹក គឺជាការចិញ្ចឹមឃ្មុំបែបធម្មជាតិ៕
ទន្ទឹមនឹងនេះដែរ ការប្តូររបៀបយកឃ្មុំរបស់ប្រជាកសិករយើង ពីការយកឃ្មុំដោយកាប់យកមែកឈើដែលជាបង្គង មកជាការយកឃ្មុំដោយកោសយកតែក្បាលទឹក គឺជារបកគំឃើញដ៏អស្ចារ្យមួយ ប្រចាំសតវត្សទី ២១ យើងនេះ (discovery of the century) ។ ខ្ញុំបាទហ៊ាននិយាយដូច្នេះ ពីព្រោះការយកឃ្មុំដោយកោសយកតែក្បាលទឹក គឺជាប្រការដែលផ្តល់លទ្ធភាពឲ្យមេឃ្មុំអាចបង្កើតឡើងវិញនូវ ក្បាលទឺកថ្មីមួយទៀត។ ដូចនេះការយកឃ្មុំដោយកោសយកតែក្បាលទឹក គឺជាការដែលធ្វើឲ្យទឹកឃ្មុំមានជីវិតអមតៈ ព្រោះបន្ទាប់ពីការកោសយកក្បាលទឹករួចមក មេឃ្មុំនឹងបង្កើតក្បាលទឹកមួយថ្មីទៀតឡើងវិញជារៀងរហូត។ យើងអាចនិយាយបានម៉្យាងទៀតថា ការយកឃ្មុំដោយកោសយកតែក្បាលទឹក គឺជាការចិញ្ចឹមឃ្មុំបែបធម្មជាតិ៕
